Pantalon a Nakiting

"Nanang, konkona daguidiay babbai nga nakiting launayen kano daytoy pantalonko," inyarungaing ni Selmo ken ni Nanang na nga agdadait. Ali latta ta dait. Di na nga ipang-pangag diay imbaga ni Selmo. "Nanang," uliten koma manen ni Selmo nga ibaga ngem saan na nga naituloy diay sarita na ta simmungbaten ni Nanang na.

"Innan. Kitaen ta man dayta konkonada nga nakiting?" Innawid na diay abaga ni Selmo nga inyasideg idiay makina a pagdaitan. Agpangato agpababa diay mata ni Nanang ni Selmo. "Daytoy nga short pant ti konkona daguidiay babbai nga nakiting?"

"Wen Nang." Kasla timek ti karnero diay timek ni Selmo. Managbabain nga ubing daytoy.

"Tumalikod ka man," punosipos ni Nanang na ni Selmo. Nagistayan pay naligos ta kimpet diay pagtarayan ti kulintipay a rikep ti tawa. "Amom nakkong, kitkitaek dayta short pant mo ket dita pay met laeng ngato ti tumeng mo ti gayadanna. Nagayad pay laeng dayta."

"Diak ngarud makikalugan kaniadan a diay caretela ni Tata Otiong," indayamudom ni Selmo kabayatan pinagininnayad na nga rimuar. Tumrem pay diay matana ti lua. "Siak to man laeng ti adda pagsapulanna," pinanunot na daytoy. "Agpantalonak to ti kapkapnekak."